ABŞ-ın Göz Erqonomikası Laboratoriyası mütəxəssislərinin qənaətincə, gözlər üçün ən təhlükəsiz kompyuter şrifti Verdana-dır. Ekranda mətnlərin oxunması üçün ən münasib şriftin ölçüsünün isə 10-12 keql olduğu bildirilir.

Tədqiqatların rəhbəri Cim Şidinin sözlərinə görə, şriftin ölçüsünün məsləhət görülən ölçüdən 3 dəfə kiçik olması görmə qabiliyyətinin zəifləməsinə və diqqətin yayınmasına gətirib çıxarır.

Azərbaycan Respublikası Təhsil Nazirliyinin 15.03.2010-cu il tarixli 294 saylı əmri ilə təsdiq edilmiş ümumtəhsil məktəbləri üçün nəzərdə tutulan yeni “İnformatika 11” dərsliyi “Bakınəşr” nəşriyyatında çap olunmuşdur. 11-ci siniflər üçün dərsliyin müəllifləri İsmayıl Sadıqov, Ramin Mahmudzadə və Naidə İsayevadır.

Dərsliyin elmi redaktoru AMEA-nın müxbir üzvü, texnika elmləri doktoru, professor Rasim Əliquliyevdir.

Apple şirkəti iPhone və iPad kimi mobil avadanlıqlar üçün yeni patent irəli sürüb. ABŞ-ın Patentlər və Ticarət Markaları ofisinə (U.S. Patent and Trademark Office) təqdim olunmuş ərizə "Elektron avadanlıqlarda qeydiyyatdan keçməyən istifadəçilərin identifikasiyasının sistem və metodları" ("Systems and Methods for Identifying Unauthorized Users of an Electronic Device") adlanır. Burada istifadəçini şəklinə, səsinə, hətta individual ürək döyüntüsünə görə "tanımağa" imkan verən texnologiyalar təsvir olunur.

ABŞ-ın “Netmarketshare” analitik şirkətinin statistik məlumatlarına əsasən, Windows 7 əməliyyat sistemi (ƏS) istifadə səviyyəsinə görə Windows Vista-nı geridə qoyub. İyul ayında İnternetə qoşulmuş kompyuterlərin 14,46 %-də məhz Windows 7 quraşdırılıb. Vista-da isə bu göstərici 14,34 faiz təşkil edir. Analitiklərin sözlərinə görə, bu, Windows 7-nin təqdim olunmasından bu günə kimi ilk sıçrayışıdır.

Bu gün istifadəçilər arasında geniş populyarlıq qazanmış Microsoft Internet Explorer brauzerinin 15 yaşı tamam oldu.

Xatırladaq ki, brauzerin ilk versiyası 1995-ci il avqust ayının 16-sı təqdim olunub.